السلام عليكم ورحمة الله وبركاته
انا بقى بصراحه مش لا قى حد بيدردش ولا بيسال عن الدردشه قولت ادردش انا وخلاص واللى يسمع يسمع واللى ما يسمعش يسمع برده
المهم امبارح واحد صاحبى من مصر رن على وكالعاده انا اتصلت عليه طبعا الناس فى مصر فاهمه انى هنا يعنى تحت الملك عبد الله بحاجات بسيطه ما يعرفوش انى انا بخيل وجلده المهم كلمته بعد سلامات وطيبون وبحاول اوصل لكلمة مع السلامه مفيش فايده قلت ما بدهاش بقه اتكلم وامرك لله
اذيك يا استاذنا
الحمد لله
اخبارك واخبار ولادك
ااااااااااه والله يا بو حميد مش تمام
لاحول ولا قوة الا بالله ليه كده بس يا عم
والله الولاد كل يوم والتانى عند دكتور شكل والولد الصغير وقع اتعور امبارح وامهم تعبانه وانا مش عارف اعمل ايه
ليه دا كله بس
والله حتى اققرب الايام النهارده امهم بتفتح النيش تجيب حاجات منه وقعت الحاجه على الارض كسرتها
لا اله الا الله
وانت عارف ان الحاجه دى مكتوبه على فى القايمه
اه طبعا اهى كسرتها وهترجع تقولك فين حاجتى على العموم انا بهدى النفوس
هههههههههه والله ضحكتنى وانا مش قادر اضحك قولى اعمل ايه
قولى انت حالك ايه الايام دى مع ربنا
والله يا محمد الحمد لله احسن من الاول كتير يعنى بقالى فترة كبيره بصلى الفجر حاضر كل يوم وبدات احفظ فى القران خلصتلى دلوقتى 3 اجزاء
اه بس هنا مربط الفرس يا باشا ايوه كده يا عم طمنى
ازاى مش فاهم
انا اقوللك (الانسان فى علاقته مع ربنا سواء فى حال الطاعه او المعصيه بيكون عايش اربع حاجات والله واحد )
ازاى
بص بس الكلام اللى هقولهولك ده مجرد فهمى انا الشخصى عن ربنا يعنى ممكن يكون صح او العكس دا مش كلام مشايخ لكن دى نصيحه شخصيه
الواحد ربنا دايما بيتعامل معاه بالستر يعنى انا فى حال الطاعه بيبقى ربنا حاطط ستره عليا فساعتها بقى لا ابليس ياثر فى ولا النفس تقوم تنتج الطاعه وفى حال المعصيه بيرفع ستره من عليا ويوكلنى لنفسى وهنا ممكن انجح واستمر على الطاعه وممكن نفسى تكون ضعيفه ودا الغالب واسمع بقى لشوشو والنفس وكل الحاجات الوحشه بتجيب بعضها ساعتها
كويس قول كويس
كويس يا بو حميد
ودول اللى انا كلمتك عنهم حالتين طيب فيه حالتين تانيين
حال البلاء وحال الرخاء الحالتين دول مختلفين شويه ازاى
البلاء ممكن يحصل ان ربنا يحط ستره وممكن يحصل انه يرفعه وفى الحالتين اختبار يعنى لو رفع ستره هتلاقى الدنيا خربانه فوق دماغك والعيال تعبانه وامهم كسرت العفش وتبقى مش عارف تعمل ايه فلو هو رافع ستره عنك مش هتصبر وممكن تعمل حاجات غلط اما لو هو حاطط عليك ستره ساعتها هتصبر وترضى وتبقى الشيخ .........
ودا يفكرك بحال سيدنا ايوب لما ابتلى وصبر ربنا مش عوضه باللى كان عند لا دا بالضعف ( فاتيناه اهله ومثلهم معهم )
طيب فى حال الرخاء لو حاطط عليك ستره هتشكر وترضى وتبقى ميه ميه لو رفعه هتبقى زى والعياذ بالله قارون انما اوتيته على علم عندى
وهنا حديث النبى صلى الله عليه وسلم فيما معناه ( اذا احب الله عبد ابتلاه فان صبر اجتباه فان رضى اصطفاه )
يعنى البلاء للمحبوبين فانت لما قولتلى ان الحاجات دى بتحصل معاك انا قولت اكيد انت اليومين دول مظبط فى علاقتك مع ربنا لان مع الالتزام لازم ابليس ما يسكتش يحاول يرجعك وهنا الابتلاء ربنا يرفع ستره شويه ويوكل عليك ابليس يشوفك هتعمل ايه فخليك واعى واستحمل شويه وشوف ربنا لما يلاقيك استحملت هيعمل هو معاك ايه
يااااااااااه الحمد لله يا بو حميد على اللى يجيبه ربنا الله يجازيك خير
طيب سلام بقى يا باشا علشان خربت بيتى وابقى بوسلى العيال مع السلامه
مع السلامه
اوووف اخيرا قفل الحمد لله هو كان مفكرنى مين يعنى فى السعوديه والا ايه المهم علشان ما اطولش عليكم قولوا طول دى كانت الدردشه وبصراحه دش فى دش والا ايه رايكم